Questo sito utilizza COOKIES TECNICI di sessione e di terze parti. Continuando la navigazione ne accetti l'utilizzo. Per saperne di più clicca qui.



di Pietro Pizzi

Al disa al pruverbi ad tant'ann fà:
" I'enn tùtt bèi mister 'd i àtar, vèdia a fà"
Ma se v'òin al guàrda un meccanic a lavurà,
ac passa la vòia fèin da guardà.

Se v'òin al vurriss 'scondas in da scùron
e usservà la giurnà dal meccanic par dabbon ,
mia appena la giurnà dal sò calvàri
ma tùtt l'ann, pò al và in cesa a di un rusàri.

Pr'a 'sta povar Cristù cundannà da un mùccia ad geint
che, sti bèin attèint, i'enn sò cleint.
Cioè tùtta geint da sèrvì con la massima cùra,
con al tòni bzont, una quàica splà ma radius in 'd la figùra.

Guài fàs vèd nec, o parlà màl ad la sò vettùra,
anca se a rangiàla via a l'e stà un'avventùra.
Par parlà mia pò che tùtt i de che Diò fà nàss
da sgiunfadur ag n'e un spatàss.

"A g'ho un ciucchèin in dal mutur
e poca acqua in dal radiatur.
A sèint un zùfflèin a la mattèin
tant'cme se sùtta al cofan 'fiss un uslèin.

Pò quand la tir fòra dal garèz,
al pàr un miracul.. Tùtt a tès.
E quand a pàrt la starnùda pr'un bel pò,
insumma am vegna vòia ad tràla in Pò."

Guài sa 't ta pèrmètt da digh da fàl...
Vòl di perd un cliènt e fà 'stà màl.
Pò gh'è sèimpar un quàica ballanùd,
ca 'l g'ha in saccogia mài gnan un scùd.

Sal fà tant d'andà fòra sèinza pagà la fattura,
sàlta fòra tant difètt da fà pagùra.
Al meccanic allura a siv cus ag rèsta?
Al nèrvùs addòss e la fattùra dal ricambista!

Ma vurriss parlè ad noi meccanic ad tant'ann fà
che pr'andà innans an sa sà pò'cme fà.
Una vota la macchina l'era fatta ad matèriàl
par tant'ann quàsi sèimpar uguàl.

Pò i'hann tachè fàia ad plastica, anca ad maiolica
e i'hann mis'cè tùtt cun l'elettronica.
Un Màrchingegn Cumplichè e Silenzius,
che paciùghèg adrè l'e un pò'brudus.

Se pò 't ver al cofan dal mutur: e sparì al carbùratur.
Un règò ad tùbèin canètt e di pastrugnèin ciamè sensur.
Di rubèin ch'i g'hann da capì tùtt a la svèltèina
pèrchè i g'hann da rèindna còint a una centralèina.

Se pò at ver una purtera
't pàr da i'ess in s'una balera.
Una mùccia da scritt e lùsein in sal crùscott
ma vèda te che gran casott.

"Meccanic, s'e pissà qull lùsèin chi,
appena pr'un attim l'àtar dì"
Guardarum in sal sillabàri a la pagina stabilì..
Dop mezz'ura ca 'c guardàva o zu dadlì,
a l'ùltma pagina gh'era scritt in lettra Maiuscula:
Càvat zu al toni e và a zùgà a briscula!


vai alla traduzione

scarica il pdf